無綫新聞部連日播出特首梁振英訪問，CY提及「換特首」對解決社會溝通冇幫助。呢個論調唔少人聽落好刺耳。陳志雲噚日亦喺商台節目《在晴朗的一天出發》諷刺CY，指好多嘢都唔關佢事：「起唔到公屋係關區議會反對嘅事，但其實區議會好多都係建制派揸莊；行李事件係機場保安同航空公司嘅事，乜都唔關佢事……咁香港競爭力第一都唔關佢事啦！」事緣CY一朝早衝出嚟領功吖嘛。
其實CY受訪時曾指，換另一人做特首，都唔會令爭取全民退保嘅人變為唔爭取，志雲大師就話推銷手法都係關鍵，如果政府推資產審查退保時繼續擺出「我啱你錯」態度，叫人點接受？大師噚日節目仲特別重播2012年特首選舉論壇中唐唐名句贈興：「梁振英，我做過嘅事我會企出嚟認。八萬五唔關你事，黑金政治唔關你事，劉夢熊你唔識佢咁滯，𠵱啲係有承擔嘅表現？」