近年表現麻麻嘅華創（現稱華潤啤酒，上市編號291）舊年轉型後，連班底都要變！在公司做咗7年嘅黎汝雄辭咗首席財務官及公司秘書職務，仲由執董轉做非執董，職務就由財務總監黎寶聲接替。
潤啤噚日4點幾公告，話黎汝雄係因為「有其他事業志向」離職。華華仲想八吓黎汝雄有咩新路數，點知轉頭大昌行（1828）就公佈黎生過檔做執行董事及副行政總裁，仲今日就生效。
雖然兩間公司業務完全唔同，但好似黎汝雄咁勤力，無縫接軌兼唔使過冷河都幾少見。不過華華都好為黎汝雄高興，因為睇返潤啤年報，黎汝雄2014年計埋人工、花紅等都係收599萬元左右，但轉一轉去大昌行，月袋40萬，如果做得好第一年仲有成980萬人工連花紅等，人工升成64%，好和味吓。