今年六月四日遇啱係星期六，到維園參加靜坐紀念六四二十七年嘅市民，會唔會多啲呢？或者唔會啩，今天嘅年青人、大學生，已逐漸對六四遺忘，唔講中國好耐咯，只講本土，兩樣都唔講嘅，更係絕大多數，佢地邊會去維園吖。1989年時嘅中大學生會人物，例如蔡耀昌、莊耀洸，眨吓眼，已是「半百老翁」（《蘋果日報》標題曾如此稱呼五十歲人士），out晒咯，左丁山呢類更不足論。諗深一層，時代巨輪不斷向前，當一位三十幾歲記者問左丁山何謂紅衛兵，左丁山就知道舊調不可再重彈。我地緬懷過去太多，徒傷肝腸。
世界上有好多大事都係由時間沖去痕跡，發生不可思議嘅轉變嘅。例如上星期五（五月二十七日）下午，美國總統奧巴馬由日本首相安倍晉三陪同，到廣島訪問，紀念原子彈爆炸，與一名僥倖生存者擁抱；在1945年8月，點會想像得到？到日本之前，奧巴馬訪問越南，有越南軍人列隊接受美國總統檢閱，又豈是1975年4月美國人與越共可以接受嘅景象？1944年時法國人點會諗到七十年後柏林與巴黎係歐洲最親密嘅盟友呀？唔講國家大事，講吓個人，1958年到教堂領取美國人捐贈奶粉嘅逃港難民，點會諗到在1990年代可以移民美加，買樓買到引起當地居民怨憤？
唔好咁多話當年，開口埋口30年前，40年前，向前望，人老了，都會開心啲，最重要還是活在當下。有一次，左丁山嘅強勁記憶力失靈，俾肥佬黎捉個正着，肥佬話：「大家都老了，哈哈！」於是想起，讓記憶力還給電腦互聯網，讓未來由時間定奪，自己最好把握每日美好時光，能享受就享受，不可瞻前顧後，望左望右，既怕得罪阿嬸，又怕得罪阿叔，個個都要照顧到，面面俱圓，邊個嚟照顧我呀！中學三年班老師教英詩，印象最深有幾行，愈老愈係覺得啱聽：Trust no future, however pleasant.
Let the dead past bury its dead.
Act, act in the living present.
Heart within, and God overhead.
（出自The Psalm of Life, Longfellow）
人老了，忘了一些不愉快事物，選擇性失憶，幾好吖，只要唔好老年痴呆，還識得跑馬打麻將，讀報紙就得嘞。