粉嶺馬屎埔村收地爭議未解決，村民同聲援者繼續留守抗爭，相信頻頻見傳媒解畫嘅恒地執行董事黃浩明，近期好頭痕。八方問過黃浩明，佢坦言近日為此冇覺好瞓；平日愛跑步鬆一鬆嘅佢仲話為咗埋首拆彈少咗做運動；睇嚟幫四叔打工，一啲都唔輕鬆。
查實係咪可以同村民坐低傾吓，唔使各自企硬冇路行！黃浩明反問，佢又點會唔想！但村民係咪想就唔知嘞。原來村民之前就會面問題送過大檸檬畀恒地，難怪黃浩明唔知若然再約仲冇機。
查實幾時會清場？黃浩明冇講明，只係話高院法官話咗恒地係該地段嘅擁有人，又頒咗臨時禁制令，其實冇乜好爭議，一切應該法治行先。如此說來，清場無可避免，黃浩明呼籲相關人士盡快離開，補充溝通之門續打開，仍然可以商討合理解決方法喎！