早排大連萬達董事長王健林公開挑機迪士尼，話有萬達，上海迪士尼廿年內難以盈利，仲話對方唔應該嚟大陸。言猶在耳，挑機之作南昌萬達城一開幕就俾人影到園內滿載迪士尼元素，疑似山寨白兵、MK feel白雪公主同變節嘅美國隊長通街走，搞到迪士尼把幾火，發聲明話要維權。
華華見到啲相，即時諗起王健林批評迪士尼優勢是IP（智慧財產），但點知佢個主題公園就山寨人物隨處係。南昌萬達城就喺微博反駁媒體，話出事嘅唔係萬達樂園，將個波踢畀萬達城入面嘅萬達商場，話係商家行為。
萬達仲話商場內商家嘅迪士尼形象商品及促銷，都得到對方官方授權許可，保留訴諸法律嘅權利。內媒昨晚再引述迪士尼指，對王健林行徑及言論感到不解。似乎好戲在後頭。