有「章魚城」之稱嘅亞洲神童張如城，5年來首次推出全新單曲《紅日之火》震撼樂壇。正當唔少人希望城城復出，可令香港樂壇重現生機之時，華華反而擔心佢嘅出現，係代表港股嚟緊無運行。點解咁講？
唔係嚇你，事關城城2001年6月出道，以主打歌《真愛是真》打響名堂，結果同年9月就發生美國「911」，恒指到9月低位最多累跌33%。2008年8月，張如城復出高唱《友誼的光彩》，不久即金融海嘯，全球市場股災together，應晒歌詞，10月見全年低位，3個月間累跌53%！咁都未夠，張如城2011年8月二度復出唱《中國的巨龍》，其後因美國債務上限危機而爆發股災，港股3個月內最多累積跌28%。
如果「章魚效應」真係靈，莫非港股短期將見全年新低？金利豐證券研究部執董黃德几就話，「咁睇真係極度脗合，不過就算秋官效應有晒數據，有時都唔準啦。」雖然「章魚效應」往績未夠多，不過話晒章魚係會食蟹嘅，所以分分鐘張如城嘅成就，會勁過秋官。