隔牆有耳:千福BB請司機好孤寒月薪唔夠一萬 - 李八方

隔牆有耳:千福BB請司機好孤寒
月薪唔夠一萬 - 李八方

經常透過facebook呃like嘅美國駐港總領事夏千福,雖然獲唔少網民大讚親民,但請人時出手卻極低。八方留意到近日美領館近日為千福BB招聘司機,但月薪竟然係不足1萬至萬2蚊咋噃。來自美國嘅UBER,司機月入都有成幾萬蚊啦,美領館反而咁孤寒,唔通為咗慳番啲錢畀千福BB周圍食?

要識維修、英語同吹水

美領館喺網頁表明,今次招聘嘅司機,主要服侍總領事夏千福,要願意輪班同喺周六日返工。見到薪金嗰欄,八方真係以為自己眼花,年薪只係$119,764至$149,704、即係平均一個月$9,980至$12,475。嘩,呢個價同美領館兩年前招聘同一職位時,幾乎係一樣,唔通美領館以為香港零通脹?
美領館講明,申請人要識得揸私家車、輕型貨車同埋私家小巴,擁有3年司機經驗,識得基本維修汽車技術,仲要懂得同高官吹水交流,對壓力大嘅工作環境應付自如。做得千福BB嘅柴可夫,當然要識講英語,相當熟悉香港道路、法例、路面情況,對政府大樓、旅客景點亦要瞭如指掌。
喺勞工處隨便睇睇,幾乎所有司機空缺嘅招聘月薪都高過做千福BB嘅司機,好似鄭家純話事嘅新世界咁,喺勞工處以月薪高達2萬6請司機,仲包晒膳食津貼、手提電話津貼、表現獎金同雙糧。千福BB以月薪低至唔夠一皮招聘司機,真係唔知香港米貴喎?

李八方
mailto:[email protected]