中銀香港（2388）早排用680億元賣咗南商畀中國信達（1359），單係稅前盈利就已經賺咗超過300億元。噚日賣買雙方舉行咗交割儀式，中銀阿媽中行（3988）個董事長田國立竟然話做大生意「不論錢，是談戰略」，又形容今次係「放生」南商，皆因業務重叠，喺旗下70年嚟都冇長大過咁話。𠵱家到咗中國信達手上，相信第時可以發大嚟做，而信達又等於多咗個銀行功能。
田董事長搵到人接貨，揸住筆錢喺手，果然連講句嘢都大聲啲，真係唔知信達同南商啲人聽到，到底有咩感受。佢仲話今次賣南商有「割膚之痛」，華華聽到啲雞皮都起晒。或者呢啲就係中國商場文化，明明賣咗賺一大筆錢，偏偏話講心唔講金。明明將個仔掛牌叫賣，轉頭又話好似含淚賣仔咁，田董事長講嘢果然好難捉摸。