【汽車籽：馬路起義】
在香港玩車可謂困難重重，不但法規多多，也欠社會氛圍，自然不如外國般普遍。但打壓越大、反彈越大，仍有不少車迷堅持迎難而上，努力實現改車夢，有人更把朝夕相對的搵食車Toyota HIACE改頭換面，乍看之下，獨特配色恍如《機動戰士高達》中的機械人渣古！車主Brian Cheung表示只想愛車與別不同，不管旁人理解與否，就是這份堅持，就連日本改車雜誌也來港追訪。
不少車主也喜歡改裝HIACE，但是像Brian般徹底則十分罕見，尤其是搶眼的綠、黑色貼紙，乍看還以為是《機動戰士高達》的渣古呢！Brain解釋，只是相信綠色會帶來好運，並說：「以前揸貨櫃車嗰陣已經玩改裝，都係參考吓日本人，睇佢哋係點樣設計，再自己構思，一邊睇書一邊問朋友學番嚟。」
眼前這台HIACE，車頭、泵把、胎軨、沙板及裙腳等，全是Brian親自設計、尋找日本配件，雖不是獨力裝配，但前後也花了四年時間，成本約20萬，花了不少心血。記者尤其欣賞趟門部份，因要遷就凸出來的沙板，Brian特意換上開合角度更大的新門鉸。他說現在改車比以前方便得多，毋須事事勞煩日本朋友幫手，直接上網搜尋便可找到不少資訊。
今年年初，更有日本改車雜誌訪問Brian，努力受到肯定，「之前香港有個大型改裝展，日本雜誌飛過嚟拍攝，個記者咁啱識得一啲HIACE嘅車房同零售商，順便嚟影啲靚嘅HIACE，所以咪搵咗我囉。當時我都好興奮，畢竟玩咗咁多年日本車，有機會登上日本嘅雜誌，的確值得高興。」
繼續貴有貴改，平有平改
反觀香港卻是另一回事，「大家仲未接受到改裝呢類van仔，覺得點樣改裝佢都只係一部搵食車，徒勞無功。」除了世俗眼光外，嚴緊法例亦大幅限制車迷的創意，「點解林寶堅尼可以出架起晒角嘅車，但我哋一般人就唔可以將部車改到起角？就係非法改裝？」Brian表示自己改車多年，從沒改動性能，亦反對非法賽車，改車只是滿足為愛車打扮的興趣，讓大家欣賞車迷的創意。既然限制多多，有否想過放棄？Brian說：「曾經有咁諗過，雖然太太都有啲唔鍾意，但本住貴有貴改，平有平改嘅心態，都會繼續改落去。不過最煩可能係驗車嗰陣，要交畀車房拆走啲零件先拎去，雖然係繁複咗啲，但玩改裝車就預咗。」其實不時要裝要拆，又有觸犯法例風險，奉勤大家改裝前三思。」
記者︰梁立勤
拍攝︰陳永威
編輯︰陳國棟
美術︰孔文彬