噚日天文台錄得32.1度嘅今年最高溫，港足球員冇偷懶，一早喺港會復操，備戰周五展開嘅緬甸四角賽。傑志同冠忠南區嘅五位港腳已經歸隊，佢哋喺炎熱環境操咗兩個幾鐘；教練金判坤收操後話，今朝會安排友賽青年隊，喺中甲嘅伊達今日先歸隊，所以唔會踢友賽。之前兩次入選都因傷退隊嘅艾里奧，就終於可以着件港隊波衫練波嘞。