教育局局長吳克儉因為城大塌頂事故，早前大呻唔可以好舒服咁放假；好關注教育議題公民黨立法會議員陳家洛總舵主呢，喺啱啱過咗嘅周日就難得可以放假輕鬆吓，晚上帶咗孖女去睇新一集X-Men《變種特攻：天啟滅世戰》，當然唔少得係食飯閒話家常，共聚天倫。
而喺呢個咁混濁政治環境下，家洛都仲有唔少開心事，包括佢嘅17歲靚女二千金綽寧Natalia，中學畢業嘞，家洛梗係歡喜若狂，仲話嚟緊暑假已經「被計劃」咗連串家庭活動。而囝囝道明呢，早前4歲生日時，家洛就特別帶咗道明去立法會，唔係睇拉布，只係食早餐啫，呢個慶生活動又幾與別不同喎。