自由黨榮譽主席田北俊擺明唔妥梁振英「冇．料．到」，試問點會嘥時間出席對方喺禮賓府嘅晚宴？識揀嘅田少梗係揀咗高登女神魯芬BB啦。
其實田少一早喺facebook上載一張喺朱銘美術館嘅相，都已經講明。相中可見佢企喺兩個擔住遮嘅雕塑人像之間，同佢哋同一雨傘下，然後留言：「有些人，縱使有距離，我都會同佢撐同一把傘。但有些人，話不投機半句多，我寧願淋雨。」仲寸爆hashtag「#不解釋」、「#我鍾意呀」。
而喺CY噚晚於於禮賓府宴請立法會議員之時，田少就出席「自由之友一年一度頌親恩晚宴」喎，一切盡在不言中。最終CY叫埋司、局長去飯局陪客，除咗泛民全體杯葛，唔少建制派都冇現身，包括謝偉俊。原來阿Paul應自由之友邀請做活動嘉賓，不過講到掀起高潮嘅，梗係高登女神魯芬BB獻唱，識揀嘅田少當然捉實佢一齊selfie啦。