去年今日，英格蘭中場史達寧仲係當紅新星，但如今已經俾熱刺射手哈利卡尼同埋下半季喺曼聯大爆發嘅新星拉舒福特搶晒鏡，差啲唔記得呢位曼城翼鋒！史達寧舊年以4,900萬鎊（約5.6億港元）身價由利物浦轉投曼城，但過去一季表現麻麻，相信同身價壓力太大有關。英國《每日郵報》話，佢喺英軍集訓營搵咗心理專家彼得斯幫手，仲話同專家傾過後諗嘢正面咗，心理質素都有改善。彼得斯喺利物浦做開心理輔導，好熟史達寧嘅情況，仲自前年起撈埋國家隊。