喺Marvel旗下嘅所有超級英雄中，美國隊長基本上係形象最鮮明嘅角色，無論喺漫畫定係電影入面，隊長份人都係咁正直愛國，即使係最新一齣電影《美國隊長3：英雄內戰》中，佢為咗維護好兄弟Bucky不惜同Ironman反面，內心都堅持要守護美國。不過，Marvel漫畫部最近就推出咗新一期嘅《美國隊長》中，竟然指出隊長竟然由細到大都係九頭蛇組織嘅卧底，隊長仲要講出洗腦宣言「Hail Hydra」，簡直顛覆晒Marvel苦苦建立出嚟嘅宇宙觀！
美國隊長叛變，令到唔少人都好激動咁向作者表達不滿。呢個時候，我腦內不禁浮現一個問題：如果「雷神」叛變又會點呢？不過呢度講嘅，係今夏將會變成自由身嘅雷霆當家球星杜蘭特（KD、圖）。KD喺2007年以榜眼身份加盟超音速，跟隨球隊由西雅圖搬去奧克拉荷馬後一直效力至今，都可以算係雷霆嘅代表人物，假如球隊嘅主將KD今夏離隊，肯定傷盡雷霆班粉絲嘅心。
無論雷霆今季季後賽行到幾遠都好，筆者都認為KD留守雷霆，同「二少」韋斯卜克一齊拍住上係最好嘅選擇！雷霆喺先擊敗馬刺，再同勇士打到搶七，已經證明咗佢哋嘅實力，當韋斯卜克逐漸變得成熟，喺場上少咗自爆，加上鎮守內線嘅「鬍鬚雙塔」阿當斯（Steven Adams）同簡達（Enes Kanter）亦有唔少進步空間，相信雷霆下季都係爭標大熱之一，試問KD又有乜理由要冒住俾粉絲責罵嘅風險而離隊呢？
文：孖八