近排睇歐洲體育賽事直播，唔少出現落大雨情況，法網、F1摩納哥站都要進行雨戰。周日德國喺主場對斯洛伐克，都受到大雨影響，見兩隊球員連傳個波都好困難。德軍教練路維事先張揚會喺今仗派多啲副選上陣，湯馬士梅拿、馬高列奧斯等都冇上陣；用多啲後生仔，作為今日提交歐國盃決賽周最後23人名單前嘅最後考察。
斯洛伐克喺賽前不斷落飛，足智彩「主客和」斯洛伐克客W賠率由開賣嘅11.5倍，到開波前得番7.5倍。德國喺開賽12分鐘由前鋒馬里奧高美斯射入12碼先開紀錄，但踢到完半場前四分鐘連失兩球反輸。雨繼續落，仲影響到下半場要延遲20分鐘先開到波，後備入替嘅德國門將達史特根喺52分鐘對住客軍中場古卡冇力嘅射門，竟然「屙蛋」入網，最後輸1:3。
德國貴為世界冠軍，但踢熱身賽唔給力就出晒名，近六場友賽只得一勝一和四負，路維賽後對輸波就話冇乜所謂：「我對己隊今場波喺進攻上嘅表現都幾滿意，但老實講喺防守上的確係有少少問題，要篩選出最後23人，真係有啲頭痕。」