香港划艇姊妹花李嘉文、李婉賢喺周日東京參加全日本輕量級錦標賽，以7分56秒31屈居日本組合得雙人雙槳亞軍。噚日返港時，嘉文話係寓賽於操：「月初知道入到里奧後，我哋兩個繼續為奧運訓練，無特別備戰呢個日本賽，攞到第二都OK。」李氏姐妹喺上月南韓亞太區奧運資格賽得第四名，本來無緣奧運，但第二名嘅南韓組合月初放棄資格，於是由李氏姐妹補上。