日本如果要喺香港搵人做旅遊大使，唔知會唔會搵教育局長吳克儉？皆因佢出咗名係遊日達人，邊度放題好食、邊度櫻花好睇、邊度買雜誌先夠刺激，相信大把旅遊貼士可以分享，唔知下周率團訪日嘅民主黨主席劉慧卿，會唔會向吳得掂請教吓？
都係講番正題先（雖然吳得掂嘅動向較惹花生友關注），卿姐下周一會率領民主黨成員到日本訪問6日，其間會同日本國會議員、日本外交部及香港駐日本經貿辦官員會面。佢話早前同日本駐港總領事松田邦紀食飯時提到民主黨有意到日本訪問，對方隨即答應並安排行程。卿姐話呀，今次外訪開支一律由民主黨自費，民主黨資助旅遊巴及繙譯嘅開支，其餘由訪問團成員負擔，估計每位要畀逾萬元。