政務司司長林鄭月娥早前憶往事，話自己讀書時只歷史性試過一次唔係考第一；資訊科技界立法會議員莫乃光（Charles）就同林鄭相反。52歲嘅佢中學就讀香港華仁，佢話讀書成績一般，點知中四上學期坐喺年年考第一嘅同學側邊。唔通勤力都會傳染？佢就喺嗰個學期首嘗人生第一次，打破埋高材生鄰居嘅不滅神話㖭！
Charles憶述升中後比較奀皮，成日被老師安排坐喺班上單丁位──即係老師面前第一個位，以便嚴密監控！港華「威水史」包括攞咗班長嘅點名簿，幫走堂嘅同學個個加番「剔」，認真係好兄弟！
中六掛住同女校聯誼
雖則成績唔算標青，但細個已想外國升學，所以中六後留學美國普度大學讀電腦及電機工程，同班唔少同學同樣等住放洋，「所以中六嗰個學期返學好hea，有啲老師都叫我哋畀吓面，唔好『肥佬』。我哋嗰時掛住搞同女校嘅活動，哈哈」。Charles話留美時會借同學訂嘅香港報紙睇，「但啲新聞過咗兩三日，邊有𠵱家一上網就乜都有？」