星期五如常到陸羽午茶，點知班老友冇一個出現，唔知去晒邊，連張大枱都要拱手讓人。好彩仍然有細枱，可以坐低，熟客大業張舉手打招呼。大業張乃中環精緻藝術品出版權威，印製字畫、古董、油畫等畫冊之多，連佢都冇法子數得晒，印製呢啲書、畫冊要有專門功夫，就係校對（一啲都唔錯得）已經需要專家藝術知識，非泛泛可比也。
吃過午飯就急步行去香港會所大廈，地下有一間地舖，以前係賣意大利時裝嘅，今年四月開始成為一間Masterpiece專門店。對珠寶鐘錶零售業有認識嘅話，當然知道Masterpiece就係數十年老字號景福嘅一個零售品牌。
呢日景福集團老闆楊秉堅在店內辦一個小型酒會招呼朋友觀賞一間意大利金飾設計名牌Annamaria Cammilli嘅產品，與在店內展覽蘇州雙面刺繡。楊兄以前在外成立中國式服裝公司「源」Blanc de Chine，為中國傳統服裝帶來新設計、新優雅品味，遠勝一般上海、北京買到嘅中山裝系列，幾年前，楊兄出售「源」嘅股權，返回家族公司主政，呢日見到佢，佢話景福以金舖打出金漆招牌，後來推展至酒店（美麗華），珠寶（景福珠寶）手錶手飾，依家拒推動集團返回源頭根本，在金飾方面下工夫。左丁山話傳統香港中國黃金手飾以婚嫁金鏈金手鐲金戒指為主要產品，將黃金與寶石及其他貴金屬融合，以優雅設計面目示人，配合中高價女士上班服裝、晚會服裝，可能係一條出路。楊兄話：「啱晒！你去欣賞吓Cammilli嘅展品，就知道一二。」楊兄決心大搞，從LVMH請來一位劉女士（Christina）做集團總經理，佢話呢間意大利公司產品絕對百分百在意大利設計、生產，並非香港或巴黎設計而在東莞裝配一類貨品。咦，全部意大利製，價錢咪好貴？非也，平過一個字母牌手袋！在場又碰到張敏儀與小思等，原來張大姐一早約咗小思及幾位朋友在香港會吃午飯，祝賀小思最近獲藝術發展局終身成就獎，飯後得知地下舖有刺繡及金飾展覽，順便入去參觀。小思就話佢好欣賞啲蘇州刺繡，意大利金飾就留番俾中區麗人入貨喇。一位攝記在場周圍影相，見到小思，突然放下相機，要求與小思合照，因為佢自細到大讀小思文章，視她為偶像喎！