甲一男籃今周已嚟到常規賽最後一輪。目前輸咗俾南華同永倫嘅東方，有養傷兩個幾月嘅洋將中鋒班尼斯復出，今晚八點八喺修頓對力爭入前四嘅福建，關鍵之一就要睇呢位兩米巨人處子表現。
班尼斯季初大腿受傷一路冇上陣，但最近兩星期開始操練，呢位身高2米03嘅27歲中鋒，今晚對福建可以正選上陣；除咗東方球迷等到頸都長，連球隊主力李琪都話期待班尼斯登場喎。
擅長防守同搶籃板
呢位曾經喺歐洲及南美等多個地方打波嘅美籍球員，實力有幾高就真係打過先知，但東方教練譚偉洋講明今場唔會畀班尼斯上陣太多：「其實佢唔係進攻型球員，希望球迷唔好期望佢每場可以攞20、30分，但佢嘅防守同籃板可以幫到球隊，呢個喺我哋搵佢嚟嘅原因。」班尼斯講笑話自己壓力好大：「好期待落場，因為係我第一場比賽，同時好緊張，啱啱係重傷後復出，我想發揮好啲，但唔容易。」
頭場七點晉龍鬥遊協
目前排第四嘅福建，同第五位嘅飛鷹同分，今日如果贏第三位嘅東方，邊隊晉級四強就要睇周五飛鷹對南青場波，如果福建輸波嘅話，就因對賽成績唔及飛鷹，所以今仗對福建嚟講係非勝不可。對於今場關鍵戰撞正班尼斯復出，福建教練安慶健好樂觀：「東方組合變化係多咗，但仲未見過佢哋之間嘅化學作用，只可以針對之前打法去部署，再加多啲協防工作，真係要睇臨場發揮。」福建中鋒司徒偉傑亦期待同班尼斯一較高下。至於頭場夜晚七點有晉龍對遊協嘅名次賽之爭；賽事票價為50及30元（長者及學生），夜晚六點場內開賣。