金發局主席史美倫（查太）公職多多，噚日同傳媒茶敍，忍唔住舉手自爆，解釋點解身為行政會議成員，出席率包尾！
查太話，行政會議定咗逢星期二開會，但佢周不時跟埋特首梁振英一齊去外地公幹，例如去印度招商考察咁。不過行會紀錄就冇計到佢因公缺席，係都要剔佢冇到，冇情講，又冇得請事假咁話。
其實查太一開始好勤力開會，但後來可能因為公務太多，出席率逐年跌watt，過去4年平均出席率，查太只有74.5%，全班最低，俾有75%出席率嘅港大校委會主席李國章贏個馬鼻，之前特首辦幫李國章解畫，事關李夫人早年要去美國醫病，李國章要請假陪佢，所以拉低咗出席率。查太應該要爭取因公缺席紀錄在案，免得俾人誤會佢懶惰啦。
噚日問到佢出年會唔會「冧莊」做金發局主席，佢話政府邀請的話，會諗諗喎。