金管局前總裁任志剛喺2009年退休後，只係做下顧問、榮譽教授呢啲虛職，真正享受退休生活。不過，最近有人喺LinkedIn入面，搵到佢個賬號，入面有齊職場資料，仲有自我介紹㖭。唔通佢靜極思動，喺呢個獵頭網站內開戶口，準備等人搵佢？
細心一諗，以「金融沙皇」身價，只要一放風話想做番嘢，肯定大把人爭住搵，到時係煩揀邊份啫。咁呢個戶口當然係假啦，任總噚日知道呢件事後，即刻發聲明話發現有人扮佢開戶，仲周圍用電郵申請，要入人哋個LinkedIn圈子。佢講到明自己從來都冇計劃開戶口，呢個係俾人假冒嘅，跟手報埋警㖭。
LinkedIn可能怕惹事上身兼得罪任總，快快手將任總個假戶口刪除。其實開得呢個戶口，一係有心玩嘢，一係當其他人儍嘅。好扮唔扮，扮個咁容易認又幾乎大家都識得嘅人，被踢爆係遲早嘅事。