虛擬實境嘅技術同裝置日趨成熟，大家愈嚟愈多接觸呢種技術，尖沙嘴K11就搞咗個《電‧藝‧感》(Electronic Vibes)展覽，有得試下全新虛擬裝置HTC Vive，玩Art Jamming(自助繪畫)。費清去現場睇過，參加者只需佩帶頭戴式裝置同無線控制器，就見到整個空間即時化身為三維「畫布」，自己可以創造獨一無二嘅立體藝術傑作。
呢個虛擬實境體驗區係由香港著名建築師伍家瑩操刀，兩部HTC Vive放喺商場中庭，公眾可免費排隊試玩。
場內仲有藝發局主辦嘅「第五屆大型公共媒體藝術展：感頻共振」入面其中一個互動藝術裝置《蠅像》，特備鏡頭會捕捉每位參加者嘅身影，信號傳送去「電子蒼蠅」，費清自己試玩過，個人只要稍為移動，成群「蒼蠅」就會喺螢幕上繞著身體，一唔郁啲蒼蠅就會飛走。主辦單位話呢個作品係提醒我哋要珍惜生活中的每個短暫時刻，學識停低去欣賞自己同周遭事物。
呢個展覽仲會展現唔少VR電子藝術，透過AWKWARD_CONSEQUENCE表演，等參加者戴上VR眼鏡，感受獨特嘅視覺同聽覺體驗。
虛擬實境體驗區
日期：5月20日至6月19日
時間：下午5時至晚上9時（星期一至五）；中午12時至晚上10時（星期六）；下午1時至晚上9時（星期日及公眾假期）
地點：K11地下中庭
費清＃要生計，也要生活＃毋忘初衷