敗也雷神，成也雷神，點解咁講？呢位榜首騎師第三場接手「港林飛魚」出閘脫腳大熱倒灶，但第四場佢馬上贏番大熱門「財寶家駒」補數。
徐雨石訓練的「財寶家駒」列陣第四場四班1400米，呢匹3歲生力軍上仗雷神接手初跑1400米大熱做二奶，今次留前鬥後，末段於外欄後發先至，以2.1倍全熱門身份補中，組合獨贏A1派18元正。
雷神贏咗「財寶家駒」之後，今季頭馬升到144場，只差一場就可以平上季145 Win紀錄，而該紀錄正正就係由佢保持的香港騎師單季贏馬紀錄。
今場賽後有研訊燈號亮起，跑第三之「曾幾何時」騎師潘頓，抗議亞軍羅理雅座騎「真好漢」，事緣在直路尾決勝階段，羅理雅控制不了「真好漢」，此駒外閃阻到其左旁之「曾幾何時」，結果競賽小組裁定有關抗議成立，於是「曾幾何時」升上第二名，「真好漢」則貶落第三，名次互調。第四名為「喜悅繽紛」，四重彩派7,952元。