稻香（573）管理層應該好有科學精神，繼3年前推出炒菜機，最近斥資500萬元研製一個幾可愛嘅傳菜機械人。機械人𠵱家喺東莞「稻香飲食文化中心」招呼客人，由於佢佔用面積較大，香港寸金尺土，租金又貴，應該唔會落嚟招呼港客嘞。
稻香落本研製呢個機械人，的確幫到做多啲生意。行政總裁梁耀進指，機械人本月初開始試用後，小朋友每次嚟到都爭住坐機械人旁邊嘅卡位，周末客流明顯多咗。鬼咩，佢唔只識得傳菜，仲會定時跳舞娛賓㖭呀，望住佢食飯都樂翻了。
其實稻香3年前已引入炒菜機，每部20萬至30萬元，可以取代到2至3名炒菜師傅，𠵱家加埋機械人，又可以慳番些少侍應。梁耀進話，家陣喺內地請人唔易，用機械人可以解決人手與成本問題，仲講笑咁話「機械人唔會偷懶吖嘛」！