皇馬前晚喺聖西路第11次贏歐聯,荷李活著名影星李察基爾賽後有份落場捧盃,全憑千絲萬縷嘅關係。話說李察基爾家陣個西班牙籍女友Alejandra個老竇Ignacio,之前係皇馬嘅財務副總裁,仲同皇馬會長佩雷斯好老友,所以喺賽前,李察基爾同Alejandra就同皇馬球員一齊坐私人飛機去米蘭;皇馬前晚最終成功捧盃,佢同Alejandra亦有落場捧盃,同皇馬球員一齊慶祝做咗歐洲冠軍。