上市公司提出私有化嘅原因，多數係公司股票交投疏落，冇乜人吼，私有化對小股東利多於弊之類，難得奧普（477）主席方杰好有創意，亦好坦白，指提出私有化，係因為公司股價長期低迷，或對公司業務、喺客戶間嘅口碑，甚至係對員工士氣持續造成不利影響。講到咁嚴重，當然要嗱嗱聲私有化喇。
老實講，唔係佢話私有化，都冇留意呢隻股。內地企業奧普上市10年，主要產銷「浴霸」，係一款集浴室暖氣與換氣功能於一身嘅家電，公司現市值約23億元，提出嘅私有化作價2.71元，較對上收市價有溢價25%，大股東要拎12.6億元出嚟收街貨。
公司話股價低迷令聲譽受損，影響士氣，以呢個理由，唔少潛晒水嘅上市公司，都應積極考慮以溢價私有化，畀小股東一個逃生門喇。