雖則不斷申明無意選特首，但政圈中人依然堅信政務司司長林鄭月娥，有力更上一層樓。但無論係等退休定臨陣出戰，林鄭一如以往咁勤力，噚日佢就一身便服look，出席無家者世界盃（香港區）籌款賽暨2016香港國際街頭足球邀請賽頒獎典禮。
林鄭一向係無家者世界盃嘅支持者，過去不時主持開球禮或頒獎禮。佢致辭時話呀，呢個活動協助唔少迷失嘅人士尋覓曙光、重燃鬥志、走回正軌，同時喚起社會關注露宿者或無家者嘅問題，促進社會共融同減少貧窮帶來嘅負面影響，值得鼓勵。佢話政府會繼續為露宿嘅朋友提供適切支援，重申佢哋絕對唔會係社會上被遺忘嘅一群。林鄭大讚香港隊有頑強鬥志，祝願港隊喺7月蘇格蘭格拉斯哥舉行嘅無家者世界盃中，力爭佳績。