過去兩個星期連同聯儲局主席耶倫在內，最少五、六位官員話美國即將再加息。儲局擺出高調「鷹姿」，照計順勢而行，跟住耶倫走，總好過同央媽對賭會更好。
細嚼耶倫嘅講話，未來數月確實可圈可點。由家陣到年底還有7個月，近嘅話下月或7月加息又得，但係話9月或12月加息都可以。我認為重點係提番大家，美國再加息係必然嘅事。耶倫演說中又講到若加息引起經濟衰退情況，儲局係冇諗過減息或詳細考慮推負利率措施，反映美國調頭減息或者推負利率嘅機會率近乎零。
今次美國再加息，同上次年尾加息玩法又唔同。前年儲局放風話收水，搞到新興市場勁走資，美元衝高近100水平，直至上年尾儲局先落實加息，難怪投資者都話儲局今次放風又再「狼來了」。今年環球經濟增長不似預期，歐、日、英等主要央行仍奉行低息政策，甚至實施負利率。美國再加息，但外面低息環境、負利率政策唔變下，新興市場未必再出現走資潮，原因在於美元。美元走勢未必再直逼100大關，主因儲局加息步伐不太快。家陣歐洲同日本仲係負利率，資金追回報惟有流入新興市場，解釋咗點解上個星期新興市場股票基金仍然吸資8.3億美元。
Captain Cool
本欄逢周一刊出