新聞主播界近排好多是非呀，唔知人氣極盛嘅方健儀Akina又點樣睇？睇佢繼續活動多多，似乎冇外界咁好氣。近年鍾情皮革製作嘅Akina前日出動，喺馬會創意藝術中心教40幾位基層長者製作皮革 （圖左）。有星級導師即場教路，老友記都特別留心上堂，喺義工協助下裁剪皮片，又按配上鈕扣及塗上唔同顏色，製作獨一無二嘅銀包。睇見老友記個個化身手作達人，Akina都好驚訝，有參與者仲即席送上親手製嘅膠珠兔仔擺設畀佢㖭呀!
查實呢個皮革製作班係恒隆一心義工隊「孖住長者當文青」活動系列最後一擊；去年推出此活動系列後至今，有成200幾個基層長者參與過花茶烘焙、咖啡拉花同Art Jamming等潮爆玩意嘞。