講到尾都係前香港騎師一哥，44歲的韋達這天手風順番，表現即刻唔同晒，頭場爆完13倍摩廐「田黃」，第二場又勝出東廐「駟寶」，火速起孖，「駟寶」單Win及組合獨贏A2分，別派87.5及27元。
第二場五班1600米，告東尼訓練、許晋亨與李嘉欣聯名的愛駒「駟寶」，贏馬跑法跟韋達另一Win「田黃」相似，都係齋跑半條直路，於外欄一衝過晒，贏得清脆利落。近排罕有地一次賽事有八匹座騎的十三少，只係用咗短短半個鐘，就包辦第一口孖寶，個人於2016年首次起孖，絕對可以話係重振雄風。
「駟寶」係城中著名夫婦許晋亨同李嘉欣今次第一Win，而「駟寶」苦戰兩季第15次出賽，亦終於打開勝利之門，可惜李嘉欣冇出現，只由許晋亨拉頭馬。而兩夫婦可分得24萬獎金。
爆開有條路，這天頭場開過千蚊連贏，第二場雖然冇咁杰，但「駟寶」搭第二名「萬醒仔」（雷景勳），呢條賽前未勝馬Q，都有四百幾蚊派，三、四名則分別為「金威勝」（雷神）及「知道勝」（潘頓），外籍騎師四重彩派二萬蚊鬆啲。