ViuTV嘅《跟住矛盾去旅行》有機添食，喺番外篇預告咗一堆嘉賓，雖然條片就遮晒樣，不過心水清嘅觀眾就認到入面嘅人，袁彌明就係其中一個。
袁彌明接受《蘋果》訪問話﹕「之前傾過嘅，不過我propose嘅幾個人就未覆，可能拒絕咗都唔出奇，呢方面就要問返ViuTV。」係咪你搵嘅對手太辣呀？佢就話﹕「譬如葉劉淑儀啦，佢哋(ViuTV)有propose葉翠翠，但係我就覺得唔係咁好，同埋都冇可能啦。」乜你同葉翠翠好大矛盾咩？佢話﹕「其實冇乜㗎喇o依家，好多年都冇接觸過喇。」關唔關以前一齊選港姐事呀？佢就話﹕「有啲啦，都N年前喇，佢嗰時釣金龜嗰啲嘢我都有批評佢，因為好影響觀眾對港姐嘅形象。」
另外，佢仲透露ViuTV覺得侯志強同佢應該幾有火花嘅，一男一女會好睇啲，不過佢就認為侯志強可能有其他更好嘅對手。袁彌明仲諗住可以搵啲建制嘅藝人做對手，好似身為政協嘅藝人，佢又唔擔心好難先搵到，因為政協都有分「大政協」同「小政協」咁話……咁即係邊個啫？袁彌明叫大家自己諗。