摩連奴做曼聯領隊，唔少人都擔心佢唔用新人，但英國《每日郵報》向各位魔迷披露咗個好消息，今季彈起嘅新人拉舒福特（左）已經同意續約。盛傳摩帥想簽伊巴謙莫域同賓施馬等大名中鋒，令人擔心18歲嘅福仔會唔會心灰意冷；但報道話福仔已經同意續約四年，周薪由1,500鎊加到上2.5萬鎊（約28萬港元），加薪近17倍！另外，《每日鏡報》話摩帥已經搵咗朗尼傾偈，仲應承朗尼繼續畀佢做隊長。