《把她帶回家》似師奶劇，唔係，係鄉土劇，感動位會用慢鏡，會推大激昂音樂，會close up淚痕，個結局擺明想你喊出七公升眼淚嗰種。片長159分鐘，好多段落可以剪走，劇本公式完全在掌握之中。唔好睇？唔係喎，又唔錯。對婆媽情節從來懷有怨念，但只要知道這是印度電影，情感係要外放啲，形體係要誇張啲，道理係要講白啲，接受能力當堂高啲。
故事好簡單，講巴基斯坦得意妹在印度走失了，印度暖男用自己的方式送佢返屋企。聽落無乜嘢，但印巴之間的緊張關係加上兩人宗教的不同，令電影多了一份深意。民族意識太強或對宗教太過執着狂熱，行善都要諗過度過，計較身份，點先？愛很簡單，飛走種族階級宗教同政治立場，大家咪人一個，這是電影的主旨，係老土㗎，前面講咗㗎啦！本片是印度電影史上第二賣座的電影，都解得通嘅。
男主角信奉猴神，見到馬騮都會敬禮，完全係宗教熱血戇男，得知小妹妹係伊斯蘭教徒都好介意，諗過放棄送佢返屋企，但最後都係冒死越界相送。呢啲安排幫佢加咗啲心理掙扎，有情有義得來有血有肉，唔係一味英雄主義。佢後段打極無事係神咗少少，不過都係嗰句啦，誇少少來講，我接受到嘅。
我最愛的無啦啦歌舞，電影無間放送，第一場慶典歌舞極有感染力，第十六排的舞者都落力笑住跳。之後的歌舞場面稍遜色，但還是好看，再後段的齋唱就覺得滯咗啲。
結局呢，我肯定牛頭角順嫂都估到，實在……娘到非筆墨可以形容。強調番，電影人願意涉足呢類題材，係好值得支持！受軍方與極端宗教份子的壓力，你估好玩咩？
《把她帶回家》
導演：Kabir Khan
演員：Salman Khan、Malhotra、Kareena Kapoor
現已上映
76分
記者：葉青霞