18歲曼聯前鋒拉舒福特上周五首次幫英格蘭上陣，開波135秒就搵到入波，幫球隊以2:1贏咗澳洲，大獲好評！究竟帶四個定五個前鋒去歐國盃好？「三獅軍團」領隊鶴臣都好煩惱，如果帶五個的話，中後場就有人要犧牲；如果帶四個的話，唔通真係帶拉舒福特而漏低史杜列治？英軍一帶一漏，究竟要點決定好呢？
最年輕「地標」入波英軍
拉舒福特今年神奇崛起，幫曼聯首次踢歐霸盃就入波，首次踢英超又入波，嚟到國家隊都唔例外，繼續有「福」到。喺上周五首次幫英軍上陣對澳洲，福仔正選上陣，開波僅135秒，見到史達寧嘅傳中省到人彈高咗，佢反應好快，第一時間抽射先開紀錄；18歲零208日嘅拉舒福特，成為英格蘭國家隊史上最年輕處子登場就入波嘅球員。喺55分鐘，下半場入替嘅朗尼建功，拉開到2:0，雖然艾歷迪亞75分鐘頭槌擺烏龍，但英格蘭仍然贏2:1。
賽後，拉舒福特被外界捧到上天，唔少英媒都認為佢值得入選歐國盃大軍，但如果福仔入選的話，叫老大哥史杜列治如何是好呢？喺初選名單入面，鶴臣揀咗五個前鋒，包括福仔、史杜、朗尼、哈利卡尼同占美華迪。卡尼同華迪今季踢到曉飛，朗尼就係隊長，佢哋三個就踢硬歐國盃㗎嘞，加埋英格蘭通常大賽帶四個前鋒嘅傳統，意味住史杜同福仔之中只能帶一個。原本史杜呼聲高啲，點知佢唔爭氣，小腿受傷，踢唔到對澳洲場波，畀咗個機會福仔上位。
史杜列治知驚自發加操
英媒話史杜嘅傷勢唔嚴重，呢個星期就可以復出，仲話佢計劃喺今日加操㖭。賽後被問到史杜的情況，鶴臣話：「我想睇吓史杜喺呢個星期六日嘅情況先，我希望佢星期一可以參與大隊操練，但我可以同大家講，佢嘅小腿傷患唔會係我考慮選唔選佢嘅原因。」鶴臣都大讚福仔冇令佢失望，可以叫嗰啲質疑佢選福仔入初選名單嘅人收口喎。鶴臣最遲星期二就要交最後23人名單，究竟佢會帶邊個、漏邊個呢，真係拭目以待。