最近股市突然來一次報復式反彈，為「五窮月」嘅好友出番啖氣，據講原因係美國加息可能性明朗化（即係6月加息升溫），反映出美國經濟站穩陣腳，八大聯儲銀行行長打開口牌唱出同一曲調：加息，加息，唔通係全部開玩笑咩，多數係聯儲局嘅期望管理動作，唱定先，等到真係加息之時，大家已有心理準備，咪作恐慌式反應。
另一個理由就係英國六月公投脫歐，有民意調查顯示留歐派漸佔上風，可以力壓脫歐派，故此歐洲市場定咗一啲。左丁山一向以為英國人最為冷靜理智，唔會過於感情用事，讓民粹情緒沖昏頭腦，二次世界大戰後民族大英雄邱吉爾都可以輸掉大選，就係證明，若英國人消化所有消息之後，佢地就會知道脫歐對英國經濟不利，避免銀紙損失重要過英國傲然獨立於歐盟之外。
英國人其實非常開放，擁抱全球化，睇吓倫敦從來不提出「倫敦人倫敦地」，任由外國富翁買豪宅買到豪宅價格飛升就知一二，此外，英超外國領隊，外國球星之多，在歐洲可稱第一，譬如上一季球季啱啱結束，第一至第八名嘅領隊，第一名李斯特城雲尼亞里，第二名阿仙奴雲格，第三名熱刺普捷天奴，第四名曼城柏歷堅尼，第五名曼聯雲高爾，第六名修咸頓朗奴高文，第七名韋斯咸比力治，第八名利物浦高普，分別係意大利、法國、阿根廷、智利、荷蘭、塞爾維亞、荷蘭、德國，一共七國人士，冇一個係英格蘭人或英國人，而在東主老闆方面，前8名球會之中，只有熱刺、韋斯咸，修咸頓係英國人佔多數股權嘅，由此觀之，英超富甲天下，簡直係全球富豪之樂土，非英籍領隊及球星之掘金樂園，但幾時有見過英超球會、球迷反對外人入侵呀，（足球球迷多數並非社會精英階層），英國人對全球化嘅態度，睇吓英超就知，係真正有能者居之，不問國籍嘅，有咁嘅足球聯賽嘅國家點可以脫歐呀？一旦脫歐，好多非英籍嘅歐洲領隊及球星就要申請過工作證，有排搞，以目前嘅狀況，英超富甲全球，KPMG（畢馬威）調查所知，全球十大最有價值球會之中，英超佔6隊，曼聯、阿仙奴、曼城、車路士、利物浦、熱刺，左丁山蠢蠢地認為，一個可以容許、容忍國內足球聯賽成為外國人樂園嘅國家，斷不會輕易放棄歐盟，到全民投票之日，英國選民就會投下理性一票，選擇留歐。