西甲嘅愛斯賓奴宣佈，簽入18歲嘅中國球員胥栩（圖），呢個係愛奴116年球會史上首位中國球員。胥栩可以踢前鋒同翼鋒，未嚟西班牙前做過山東魯能青年隊嘅隊長，仲被稱為「小美斯」㖭。雖然佢入唔到巴塞隆拿嘅青訓，但輾轉效力UE Cornella嘅青年軍，直至今夏加盟愛奴。相信胥栩短期內會喺愛奴青年軍繼續學嘢，目標當然係有朝一日踢西甲啦！我求大俠估計，愛奴無啦啦簽個中國球員返嚟，應該同佢哋嘅班主、中國公司星輝互動娛樂有關。