阿根廷喺上周五進行備戰美洲國家盃嘅第一場熱身賽，喺主場迎戰洪都拉斯，最終藉希古恩入波以1:0小勝對手。
今仗強陣出擊嘅阿根廷，除咗美斯之外，迪馬利亞、馬斯真蘭奴同阿古路等都有披甲，開賽31分鐘就由希古恩先開紀錄。踢到58分鐘，美斯被對方球員連環撞倒，整親條腰，狀甚痛苦，經一輪治理之後行返更衣室。教練馬天奴賽後話：「美斯被撞到條腰，覺得好痛，將會接受磁力共振檢查，等結果出嚟先知道確實情況。」
至於，日前傳話阿根廷中場馬斯真蘭奴已經離開咗巴塞隆拿，仲同祖雲達斯簽約，佢就作出否認，話冇同任何球會簽約，但亦暗示唔滿意喺巴塞成日要串演中堅，所以佢係咪會走，都仲係未知之數。
智利主場遭「牙」咬
另外，兩大南美勁旅亦喺上周五踢熱身賽，同樣係美洲國家盃奪冠熱門之一嘅烏拉圭，主場迎戰千里達先失守下，由卡雲尼梅開二度反勝3:1。衞冕嘅智利就失威，有阿歷斯山齊士在陣都喺主場以1:2輸畀牙買加。