網上睇到有朋友分享20年前嘅Euro 96，主辦國英格蘭強勢入四強，結果同德國互射12碼然後正路地飲恨，但已經係英格蘭近20年最佳成績！
有網友留言話，睇番當年啲片，好似噚日嘅事，好似係，或者我哋一廂情願地想係。其實廿年前嘅1996係幾獨特幾難忘，越諗越可愛，點解廿年前後好似這麼近那麼遠呢，可能係因為當年好多嘢好得，到今日都仲好得。
1996，碧咸由一腳半場射死溫布頓開始，幫自己同曼聯打造品牌，紅足廿年。碧咸個friend湯告魯斯響當年拍第一集《職業特工隊》，上年啱啱做到第五集，仲好收得。呢一年係香港體壇里程碑，令到好多人知道運動員唔係臘鴨，就係全靠李麗珊響亞特蘭大奧運風帆攞咗第一面金牌，成就香港零的突破，暫時亦後無來者。而輪椅劍擊選手張偉良就響同年嘅傷殘奧運會，贏咗四面金牌。港足嘅世界排名亦響96年排得最高，坐過第96位，𠵱家呢，香港世界排名第143。
電影方面，96年頭開始hit嘅《古惑仔》當年一年拍足三套，一班友情歲月蠱惑佬𠵱家都仲巡迴表演緊，來忘掉錯對來懷念過去，而我哋當然永遠懷念神父阿叔。當年好多人最喜愛嘅電影，就梗係睇完又睇抄完又抄嘅《食神》，呢套比初戀更加詩情畫意嘅作品響96年尾上演，諗番當年聖誕應該很高興。至於96年金曲金獎原來係明福俠嘅《情深說話未曾講》，你這剎那在何方，我有說話未曾講嘅歌聲，今年仲長時間響維港縈繞不散。
96年真係好多破天荒嘅第一次，包括香港第一次舉行行政長官選舉。食神話齋，人人都可以係食神，響20年前嘅黃金時代，我哋每一個都可能有自己嘅獨特故事，嗰年，自己第一次參與大賽講波，個咪亦揸到今時今日。
KEYMAN
節目主持
電郵：mailto:[email protected]