正所謂「嘢可以亂食，說話唔可以亂講」，就算你係「簡大帝」簡東拿都係咁話。事緣簡東拿早前接受訪問嗰陣提到，有北非血統嘅賓施馬同賓艾化入選唔到法國國家隊歐國盃大軍名單，係因為佢哋嘅種族問題。嘩！種族歧視呢樣嘢喺球壇嚟講，係一件好敏感嘅事，簡大帝呢個評論傳到入法國國家隊教練迪甘斯隻耳度，迪甘斯梗係唔高興啦，而佢嘅代表律師仲話，唔排除會告簡東拿誹謗㖭！