今年大專院校學生會唔參加支聯會悼念六四集會！而民間社會仲係好積極搞紀念六四活動，好似社區文化發展中心視覺藝術空間碧波押就主辦《「仲講呢啲?!」六四漫畫展》，展出幾十幅包括漫畫家尊子、本地薑、馬龍、梁阿平、一木和變態辣椒，以及水墨畫家方蘇嘅時事政治漫畫作品。
今次展出嘅主要係佢哋過去嘅六四主題作品，仲有人會嘗試將舊作「改造」，實行「自我二次創作」後再展出，尊子更會將佢1989年六四屠城時、報上刊登嘅作品複製公開派發，又展出新作《人民英雄無錢買樓》（2016）。想睇嘅市民可以係6月3日至7月3日（逢星期一休息），到油麻地上海街404號地下碧波押參觀，開放時間為下午1:00 至晚上8:00。