周五舉行嘅法國網球公開賽，四號種籽梅古露莎喺女單第三圈以直落兩盤擊敗慧美雅，可以話係大熱勝出；至於六號種籽哈蕾普喺另一場先輸一盤下，以盤數2:1反勝被喻為「日本細威」嘅日本新星大坂直美，真係贏得驚險。（now671及672台今日5:00pm起直播）
梅古露莎喺女單第三圈面對非種籽比利時嘅慧美雅，一直穩佔上風，兩度破發後以6:3先贏一盤。呢位22歲西班牙球手喺第二盤更乘勝追擊，向對手派蛋贏6:0，並以盤數2:0勝出，成為今屆首位打入女單16強嘅選手。梅古露莎賽後好興奮咁話：「我好滿意今日嘅表現。我真係好想贏法網，希望我可以繼續保持狀態！」
梅禮K.O. 37歲老將
至於哈蕾普嘅晉級之路就驚險得多喇，呢位24歲羅馬尼亞球手面對世界排名101位嘅18歲日本小將大坂直美，竟然先輸一盤4:6，仲嬲到掟拍㖭！好彩佢憑住穩定發揮，連贏兩盤6:2、6:3反勝，下一圈會鬥21號種籽澳洲嘅史杜莎。呢位六號種籽話：「我真係好開心，同埋我想向塊球拍講聲對唔住，我喺第一盤真係太緊張，所以情緒失控掟拍。」不過，10號種籽捷克球手姬維杜娃就冇咁好彩，同日以0:6、7:6、0:6輸畀美國嘅羅渣絲，可以話係爆冷出局！
男單方面，二號種籽英國嘅梅禮喺第三圈，唔使兩粒鐘就以直落三盤輕取克羅地亞37歲老將卡洛域，順利打入16強。
