夏天到，又係水果季節，早前同個friend Amy姐逛油麻地果欄，見到啲泰國芒果好靚，忍唔住夾份用50蚊買三個分(唔係孤寒呀，芒果唔好食太多吖嘛）。
好多人鍾意食芒果但又怕，因為好容易食到成手都係，而且核嘅肉好鬼難食到，唔通真係放入口損咩？（其實個個喺屋企都係咁食㗎啦）
查實，要食芒果而又不失霸氣，問費清啦。How to eat a mango like a boss，方法好簡單，只要喺個芒果其中一面，用刀（或鐵匙羹）鎅個正方型，好似幫個芒果開一個窗口咁，然後用一枝長嘅鐵匙羹，慢慢潷啲芒果肉出嚟食。當食到一半，芒果核下面嘅肉就會潷唔到，呢個時候，就係重點喇，只要隔住果皮，用陰力慢慢咁轉塊芒果核，將塊核上下掉轉，下面嘅肉就會上咗嚟，之後繼續用匙羹潷埋啲肉出嚟食。
呢個方法，看似複雜，其實好鬼簡單，幾乎一次就上手，因為芒果肉其實好淋，用少少力就可以掉轉塊核，而且，最重要係隻手一啲都唔會污糟，因為個芒果仲有皮包住，啲汁唔好周圍滴。
當你見到食完嘅芒果好似一個碗咁乾淨，就好似有啲人食完大閘蟹，可以砌返隻蟹出嚟咁，果種快感．．．
費清＃要生計，也要生活＃毋忘初衷