食完午飯行落石板街，未到大道中，俾一位仁兄攔住，叫一聲：「你係唔係左丁山？」急忙望清楚對方，見佢笑口吟吟，有善意冇惡意，只好應一句，細細聲：「係……」點知有一個檔主聽到，又加入大嗌一聲。「佢就係左丁山啦！」嘩，想話遮遮掩掩都唔得，自己又唔係大明星黎明，有啲唔慣噃，好彩佢地收尾一句就係：「我地睇你寫專欄好耐㗎嘞。」唯有連聲多謝，急步快落樓梯。
行咗幾步，醒起有星期日馬經排位版咯噃，於是搵路行去買，在戲院里買齊所需，揭一揭一片光明跑第幾場先，原來係第十場13號排第9檔，沉思隻馬有冇機會之際，老友N自萬邦行走出嚟，口裏含着牙簽，唔，一定係在賽馬車會食完清蒸石斑嘞！老友N見到左丁山手持馬經，即刻問：「有冇馬出，有冇機會？」照實告之，佢話：「淨係講一句，一片光明贏唔贏得先？」
邊有咁易估算到喎，星期日第十場14隻馬跑千二，好幾隻馬有機會，初步認為最好嘅係1號華盛高飛（12檔），3號英勇大師（6檔），在A+3跑道，係千二米劣檔，次選8號世澤之星（5檔），5號酣睡密碼（1檔）呢兩隻就抽得好檔位，所以呢四隻馬都有平均機會，第三批就係4號嘉應之友，9號仁仁友福，11號迫擊炮，13號一片光明，一共8隻馬可以爭勝。一片光明雖然狀態勇，但升上第二班遇上強敵，暫時唔敢睇得太高，呢場預備買五隻馬四重彩複式，就係1，3，5，8，13，大膽飛走迫擊炮。但要睇埋場地，天文台預測星期五六有大雨，可能有雷暴，星期日有驟雨，於是賽前估計星期日跑到第十場，場地可能係好至黏地，一片光明可以應付，但非突出，酣睡密碼，世澤之星，迫擊炮在呢方面係好一啲嘅。綜合嚟計，希望一片光明可以順利入閘，騎師史卓豐走位醒定啲，憑輕磅之利，搶入三甲攞吓獎金啦，三歲馬仔要贏呢一場確實有難度。
同老友N講完馬，大家行到中環街市，醒起蘋果日報講過，市建局董事周光暉話要請左丁山入街市參觀，心諗無謂啦，周董事不如叫市建局公關部為傳媒辦一個「中環街市開放日」，邀請全港媒體入去任影唔嬲，將內裏情況呈現香港市民之前。老友N就潑冷水：「大凡開放日都係會見到啲好嘢嘅唧，否則公關部實炒魷魚！」諗落又幾有道理，都係無謂叫周董事做場公關騷咯！