前人大代表「飛天朱」朱幼麟，講到明一定會追究特首梁振英行李門事件，噚日佢再次開記招爆大鑊。正所謂有圖有真相，飛天朱近排就從一位有身份兼靠得住嘅「有關人士」手中，得到一張絕密短訊截圖，內有行李事件嘅重要線索。
「大老板要我們全部收聲」
兩條短訊分別係「梁振英，大話精。在電話內罵到國泰的女同事哭了」、「處理這件事情的，都是我們頭等Team的同事。大老板非常重視，要我們全部收聲」。至於短訊係咪嚟自國泰有關員工？飛天朱唔肯講，叫八方自己估，但佢話短訊入面短短幾十個字，已感受到涉事員工承受幾大壓力，就連爆料畀佢嘅「有關人士」都受到壓迫，無法公開發聲。
佢仲話，短訊證明咗，佢踢爆國泰女職員同CY講電話講到喊絕非老作。機管局報告入面，亦刻意迴避梁特電話內究竟講啲乜，加上涉事人全部匿埋，家吓仲有證據顯示國泰高層逼人封口，咁嘅白色恐怖香港人點可以忍。
件事擾攘咗差不多兩個月，飛天朱仲係好有信心可以查到底，因為件事唔單止特首、高官誠信有問題，連政府部門都變咗為特首一家嘅特權服務，佢仲特登成立咗個爆料熱線（電話號碼︰9579 1810），呼籲知情人士訴冤屈，兼提供更多行李門線索。對於飛天朱嘅指控，八方搵過特首辦查詢，結果拖到截稿都未回覆。至於國泰高層究竟有冇下達封口令呢，佢哋發言人就話，喺之前份報告交代晒，冇嘢補充。
李八方
mailto:[email protected]