特首會同行會早前批准向香港教育學院授予大學名銜，特首梁振英噚日喺辦公室簽署《2016年香港教育學院（修訂）條例草案》（圖），條例今日刊憲後就生效，教院其後會正名為「香港教育大學」，係2006年後首次有大專院校成為大學。
未到放假嘅舒服時刻，教育局局長吳得掂都有出席簽署儀式，教院嘅校董會主席彭耀佳、校長張仁良，副校長包括李子建、呂大樂、黃敏兒，甚至前校長即係現任運房局局長張炳良同大學教育資助委員會主席唐家成，都有見證呢個重要時刻。
CY感謝校董、師生、舊生為教院付出嘅努力，相信教院會續為香港嘅教育事業作出更大貢獻，仲將簽署條例草案用嘅筆送畀香港教育大學做紀念，認真矜貴咯！