李斯特城前鋒占美華迪（左）喺周三同碧琪（Rebekah Nicholson）行禮結婚，咁高興嘅日子，一班隊友兼老友自然要嚟贈吓興，隊長韋斯摩根、丹尼森遜、舒洛比同華斯利斯基等都有到場。臨近歐國盃決賽周，華迪都知道要以國家為重，周三婚禮唔會有勁飲狂歡，佢話：「雖然未致於要宵禁，但作為專業球員，都知道有咩唔應該做，婚禮當晚最緊要瞓得夠，之後就準備歸隊返國家隊報到。」咁乖豬，英格蘭最後23人決選名單，鶴臣實預埋你喇。