吳卓羲一向都有媾女王之稱，去年約滿無綫全力返內地拍劇，成績不俗，去年更連續接拍五劇，密搵人仔外，亦順勢將媾女戰場轉移。
昨日有報道拍到吳卓羲近日返港休息，指他再施展當年以媾女戰車「偷運」國產乳牛張馨予返私竇方程式，到沙田酒店接新女拍拖。一向愛低調媾女的他，非常有警覺防見光，當日由司機以七人車接送，由大埔比華利山住所出發，他先到附近兜圈才到沙田某酒店接女友。
今次偷運的短髮女生，外貌並不標青，她戴着黑超，年約廿多歲，身材瘦削有別以往巨乳質素，不過輪廓外形有點像去年被爆指在上海機場接吳卓羲、之後又在微博以Mandy_IceQ自爆戀情的女子。「羲女郎」先由司機安頓上車，入車廂會合男友，而吳卓羲一見女友急不及待拖手，二人乘坐的七人車向將軍澳方向出發，其間發現有傳媒追訪，多次擺脫不成，就去了吳位於深井碧堤半島舊居。由於吳卓羲現與母親及家姐同住比華利山，故有指他保留舊居作「行宮」，方便與女友過二人世界。
「係接個朋友」
問到同行女子是否去年接機的Mandy時，吳卓羲昨日在電話中說：「唔回應，呢啲朋友唔需要講太多，唔使講咁多，係接個朋友，佢經理人都喺度。」
吳卓羲在無綫年代曾暗交不少花旦女星，如佘詩曼、官恩娜、徐子珊、馬賽等，近年就轉口味鍾情國產女子，如11年就與國產乳牛張馨予拍拖，大前年就瞞着圈外女友與內地女星盛君發展了一年地下情。
採訪：唐如
