利嘉閣地產總裁廖偉強（Willy），接受財經記者訪問當然駕輕就熟，反而面對幾個細路，就被殺個措手不及！
ViuTV前晚出街嘅《晚吹：一大一路》，Willy就接受五個8至10歲小朋友訪問。呢幾個細蚊仔人仔細細，又估唔到佢哋問啲問題仲尖銳過記者！
即是咁，一般記者都唔會無啦啦行去個CEO度問佢，「你一個月人工有幾多？」但小主持Christy就單刀直入，問呢個咁敏感嘅話題。咁Willy就好正經咁答，「如果好好市道，個市好旺，都有機會達到一年八位數，如果個市普普通通，應該勉強都有七位數。」聽到咁多個位，見到Christy即時有一個好驚訝嘅表情！勁可愛！
小朋友們好似對有咁多個「0」覺得好Amazing，之後耐不耐又問一條同「0」有關嘅問題。小主持Jacky仔，無啦啦問，「你做呢份工係咪想搵快錢？」咁Willy就話，「搵快錢就唔係一定係呢份工。呢份工係多勞多得，越勤力就越有機會賺多啲錢，所以就揀左地產代理呢份工。」然後Jacky仔就話，「因為聽佢講8位數字係好大，所以想問佢係咪想搵多啲錢。」
然後有小朋友問依家成交額一單最高可以幾多，Willy就話最高可以100億架！然後Christy又問，「一億有幾多個0？」Willy就話，「一億後面有8個0」之後就引起一眾小主持嘩然，之後Alvin就話：「邊個有咁多錢。」估唔到Jacky仔即時搶答：「我知！李嘉誠、馬雲！」犀利！
小主持Alvin，似乎好關心自己幾時買到樓啦，佢問：「如果一個月嘅零用錢係280蚊，我幾時先可以儲到錢，買最平間屋？」點知Willy就撥冷水，「280蚊好難去儲得到，除非你攞去投資囉」勢估到，Alvin就反作出一個非常老積嘅回應：「我知呢一個係一個奢望，滿足下我希望啦！」
之後Alvin仔又問，「如果有客人叫你收少啲佣，你會唔會推卻呢？」真係估你唔到，Willy又係好正經咁答，通常如果係投資者仲係熟客，都會有嘅，但用家方面，就好少會要求減佣，除非你做得比較差。
好啦，睇晒全集，最好笑個位，竟然係最後兩分鐘，由小主持講返對Willy嘅感覺。
Jacky仔：「我覺得Willy哥哥份人好善良，講野啲聲好似女人啲聲。」