踏入店內，笑容可掬的sales姐姐率先奉上熱茶，細心推介再試用，然後教授美容小知識、今期流行……原本只是想買一支小唇膏，試試吓個底霜都幾貼服喎……
「𠵱家張單都800蚊喇，買滿1,000蚊可以成為會員，儲分之餘仲有套小禮品送，不如揀多支眼線筆吖！」最後為入會不知不覺買咗一大袋。
這個情景，大家在護膚品專門店都經歷過。最終發現，當日買的平日無機會用；而所謂的會員儲分，大概就是100蚊一分，一年內儲到100分就換個小小眼霜……
點解女人成日俾人踢入會呢？女人錢係易賺，不過今時今日做零售，除咗sell件貨品外，更重要係服務，尤其嗰種尊貴優越感，所以由你入門口開始，個sales就會出盡奶力取悅你。
再瞄準貪小便宜的心態，入會後狂寄宣傳品換領券引誘你，諗住貪個小便宜去換個試用裝，就正中下懷荷包又出血，因小失大。衫褲鞋襪可以着幾年，但精華、粉底、面霜最多咪用3個月就用完，所以無論個市幾差，化妝護膚品仍然是必需品；加上來港自由行大減，過往目中無港人的sales姐姐將會加多幾錢肉緊跑數，買還買，女士們記緊保持理性。
越野兔
本欄逢周五刊出